故事背景：
生於基層之家的志勤是家族中九代單傳，因為望子成龍，家人不惜一切讓他入讀名校，可惜他不是讀書的材料，未能在校完成高中課程。他在其他中學順利畢業，並投身高薪的莊荷行列，業餘還修讀了博彩相關學位。雖然志勤為人勤奮上進，有感身份在社會上未被尊重，他期望兒子“有為”可以代他完成心願──在名校畢業，在社會上有所作為，受人尊敬。可是，入讀名校之機會率非常渺茫，他走上了父母當年期待中獎的歷程。故事開始於２０１２年，一個冬日的早晨……
主要人物：
志勤：故事主角。生於基層之家的九代單傳，中學畢業後任職賭場莊荷，曾於業餘修讀有關博彩學位課程。因為過去未能在名校畢業而耿耿於懷，期望兒子有為代他完成未了的願望。
卓民：志勤在名校時的好朋友。在學時成績名列前茅，畢業後入讀名牌大學，畢業後回母校任教。
小燕：志勤妻。和丈夫一樣，中學畢業後任職賭場莊荷，對丈夫之執著存質疑，但支持。
麗姐：志勤媽媽，基層婦人，善良有愛心。
有為：志勤的兒子。三歲半，是個聰明乖巧的小男孩。
第一場
時間：凌晨四點
地點：某賭場內
人物：志勤、賭客A和B、JOHN、CANDY
燈亮，賭枱上，志勤執行莊荷工作，內地賭客A和B輸錢中，心情極為不悅。
賭客A：(講普通話)他媽的狗小子，買大開小，買小開大！(惡狠狠地望著志勤)
賭客B：(講普通話)這邊運氣壞，要不要去那邊再玩！
賭客A：(講普通話)去他媽個屁，今天我不把狗小子的錢贏回來，不姓王！(說著在賭枱上拋下1萬籌碼買大)
志勤：請下注……(目光無神，用毫無感情的、不太標準的普通話說出)
賭桌計時器響起鐘聲，表示閉盤時間將至……志勤雙手交叉，示意停止下注
賭客A、B：(講普通話)大、大、大……狗小子！開！開個大！
志勤：(無奈地)2、3、5，10點，小！(賭枱顯示小的位置燈亮，志勤吸一口氣，露出沒趣表情)
賭客A：(講普通話)操你娘的！狗小子，你笑什麼笑？！(把手上的籌碼擲向志勤)
志勤拾起，目無表情地放回賭桌，並把籌碼推向賭客A
賭客A：(講普通話)我問你笑什麼笑？說！笑什麼？他媽的狗小子，老子輸了，你還笑！
JOHN：先生，我是這裡的經理，有什麼可以幫忙的嗎？(誠懇地)
賭客A：(講普通話)經理！來得好！我輸錢了，他竟然笑，啍！狗養的！
JOHN：(講普通話)哦！這樣！……我想他不敢的。(望著志勤說)大家只是一場誤會，是不是！
志勤：係！（點頭無奈地）
賭客B：(講普通話)算了！算了！只是一場誤會！(表示認同)
JOHN：(講普通話)先生大人有大量，我請你飲杯啤酒下下火！（轉身召喚遠方的女侍應，用廣東話說）CANDY，攞杯啤酒比呢位先生！
賭客A：(講普通話)我大人有大量，不跟這種小人計較。狗養的！嘴巴注意點！
賭客Ｂ：(講普通話)已經開三局小了，不如我們轉買小吧！
賭客Ａ：(講普通話)說你笨就笨，沒可能連開四局小的，已經第三局了，下局準是大！
賭客Ｂ：(講普通話)已經輸掉十萬了，要不停一局觀察一下！
賭客Ａ：(講普通話)也好！就停一局！
志勤：請下注！
賭桌計時器響起鐘聲，表示閉盤時間將至……志勤雙手交叉，示意停止下注
志勤：6、6、5，17點，大！(賭枱顯示大的位置燈亮，志勤心裏暗笑，怕被發現，連忙低頭不語)
賭客A：(講普通話)唉！他媽的！都說大的，就是沒買，都是你！
賭客B：是我！是我！下局依你的！
志勤：請下注！
賭桌計時器響起鐘聲，表示閉盤時間將至……志勤雙手交叉，示意停止下注
賭客A：這個……這個，大？小？……是大，剛才都三局小的！(先1萬買大)不！做個保險，買個點數8，把他媽的全贏回來(又拋出5千買點數8)
賭桌計時器響起鐘聲，表示閉盤時間將至……志勤雙手交叉，示意停止下注
志勤：2、2、2， (賭枱顯示圍骰的位置燈亮，仰制著心裏的激動地說) 圍骰！
賭客A和B驚訝地站起，剛巧CANDY拿著啤酒過來，賭客A身體大幅度的搖擺碰翻了啤酒杯，啤酒灑了一身……
CANDY：(講普通話)不好意思！不好意思！
賭徒A：(講普通話)他媽的！你們一伙的，是不是？今天輪流害我輸錢，還用啤酒潑我！賤貨！(他惡狠狠地扯著CANDY不放)
JOHN：唉！仲咩咁唔小心呀！
賭徒A：(講普通話)狗養的！我要投訴！我要投訴這男的，我要投訴這女的，我要投訴這賭場……
志勤：(講普通話)是你先起來碰著CANDY的！(站起來)
賭徒A：(講普通話)你這臭屁蟲還說我……(目露凶光地盯著志勤)
志勤：(講普通話)我不是說你，我只是講道理，這根本就是意外……你……你不是說大人有大量嗎？
JOHN：一人少句啦！(示意志勤收口)，你地、你地……落場啦！走啦！CANDY你唔啱，道個歉！
CANDY：(講普通話)對不起！對不起！
JOHN：(講普通話)先生，不好意思！請您到樓上貴賓室換件衣服，稍後找人幫你洗衣！
賭徒B：(挺身而出)，那這局怎辦？不算數吧！
志勤不敢作聲，望著JOHN。
JOHN：(有點為難) (講普通話)唉！對！對！不算數！(用廣東話示意志勤和CANDY離開)你地下更先！
賭徒A：(叫住志勤) (講普通話)你！男的給我站住！告訴你，別來教訓你的客人！你他媽的有什麼資格去教訓人？有文化都不做這種鬼屁的事情，有種當老師去！
志勤低頭不語
JOHN：(講普通話)對！對！當老師的才愛教訓人嘛，大家少說幾句！他們下班了！我們去貴實廳(示意大家快離開)
各人散去(燈光轉暗)
第二場
時間：清晨
地點：某賭場員工休息室
人物：志勤、馬王、CANDY和JOHN
燈亮，差半小時才下更，休息室非常冷清，只有已下班的馬王在一角讀 “馬經”，志勤和CANDY入。
CANDY：累你被人鬧，真係唔好意思啦！
志勤：冇事！佢輸錢睇我唔順眼啫，大家都慣晒，算啦！食得咸魚抵得喝，份人工包埋啦！
CANDY：我知！所以我點都會向佢賠罪！
馬王：賠罪！人家輸左錢不爽，自然要搵個人來 “陪”，受人錢財，替人消災，唔使勞氣！等下我哋都去搵香港馬會“賠錢”！
CANDY：唔好 “老吹”啦！跟你投過幾次，冇次贏既！
志勤： “以小博大”嘛，哈哈！
馬王：志勤真有眼光！(拿出馬票興高采烈地宣布)各位叔伯兄弟，我中左──三千大元！三千元足以 “有仇報仇”，返工就比“大陸佬”問候，等陣放工搵個 “大陸妹”賠下罪！志鵬，要不要預你一份？(談得眉飛色舞)
志勤：唔使啦！我有仔萬事足，今晚開彩 “六合彩”，中左七千幾萬，就可以買番幾個間屋比個仔，仲埋佢去外國讀書！
JOHN從後入
JOHN：天光啦，各位！發夢冇咁早！
CANDY：個客點呀？
JOHN：有房休息、有人請食早餐、洗埋衫……著數攞盡啦，仲想點？係啦，志勤，你過來簽番張單，證實個賭局作廢！
志勤：上頭會唔會唔鍾意？
JOHN：咁就梗係唔鍾意啦！好心你就忍下口啦！講咩道理呢？你估你教書咩？
志勤：我講事實啫，係佢唔小心在先……
JOHN：講咩事實啫？事實就係 “賭客永遠是對的！”，人家比錢你使嘛！
馬王：JOHN哥！算啦，勤少係有為青年，人家讀過名校架……雖然畢業唔到業，但始終比較有氣質……點似我地……
志勤：講左去邊呀？……有錢好叻咩？你睇下個D賭客，咪又係財來財去；再睇下個D富二代，唔係攪女人就係用車撞死人……
JOHN：我唔係話你無理，你點止有理，你仲有學歷呀！你有公開大學學位呀！要升易過中六合彩好多，點解每次升都抽唔到你？咪就係你唔得醒目囉！
CANDY：好啦！好啦！過左去就算啦！快收工啦，返屋企訓番覺好過！
各同事散去(下台，燈光轉暗，台燈照著志勤一個人)志勤若有所失地發呆，不久，從錢包掏出兒子 “有為”的大頭照，精神一振，昂首闊步離開。
第三場
時間：早晨
地點：教育中心
人物：志勤、有為、Miss Wong、小明和曉彤
燈亮，Miss Wong在觀看小朋友們遊戲
小明：我想玩木馬！(看著有為在玩木馬)
有為：我未玩完！(說罷，沒有理會小明)
Miss Wong：小朋友，大家停一停！(眾同學都停下來望著她，她繼續說)各位小朋友，你地去面試既時候，除左要回答老師既問題，如：你係男仔定係女仔呀？邊個係蘋果？橙同桔，邊個大D？……係課室外面，老師仲會觀察下你哋遊戲既時候乖唔乖？有冇禮貌？好啦！各位同學，老師請有為同小明做個示範。
Miss Wong：小明，你來！你剛才唔係好有禮貌，你應該講咩呀？
小明：(呆滯地)我想玩木馬！
Miss Wong：仲差少少，我之前教過大家既，邊個記得？
曉彤：我記得！佢應該話“唔好意思，我可唔可以玩木馬？”
Miss Wong：唔！曉彤真係好叻囡！我又想問下有為，你見到有小朋友想玩，應該點做呀？
有為：(無奈地)老師話，要讓比小朋友玩先，要分享！……但我啱啱先玩，仲未玩完……
Miss Wong：唔緊要，面試完離開學校，叫爸爸媽媽帶你去玩過，知道嘛！
有為：知道！但我鍾意中心呢個木馬，公園個D唔可以行，中心呢個可以向前行……
Miss Wong：(聽了有點驚訝)哦，原來係咁，如果去考試乖，老師比你返來再玩！(忍著笑)好啦！今日放學啦！記住要自己著鞋，唔好叫爸爸媽媽幫手，如果唔係，會扣分架！
小朋友：(一起答)好！
志勤按鈴，Miss chan門開……
Miss chan：王生，早晨！有為，你爸爸來左！(她轉身叫有為)
有為：爸爸！(興奮地跑出來)
志勤：(蹲下去，撫著兒子的頭)為為，有冇乖呀，叻唔叻呀？下星期就去 “育才中學”考試啦，要醒D！
有為：(不明所以地點頭)知道！我叫 “王有為”，今年四歲！
志勤：(急不及待地)下星期就考試啦，Miss認為有為情況如何？
Miss chan：有為好聰明，自己同埋家人既名、幾歲、咩顏色、講故事等都識晒啦，而且佢十月出世，比正常小朋友大半歲，應該十拿九穩既！不過，呢幾年出生率高，育才係名校，對小朋友同家長要求一樣高，父母都要面試，你地都要準備下啦，我地有專門為家長而設既課程……(滔滔不絕地)
志勤：哦……哦……，我本人係校友(說的時候有光榮感)，我對學校好了解！
Miss chan：(很高興的樣子)哦，咁太好啦！校友會加分，如果搵到學校老師做介紹人，機會率更高！
志勤：(誠懇地點頭)我明白！多謝Miss！
有為：爸爸，你地講咩好高呀？
志勤：哦！Miss話，你咁叻，中獎機會好高！
燈暗下，志勤離開中心大門，繞了一圈，到達台的另一端，站在巴士站前。射燈亮起，投住志勤，他拿出電話不停按動，若有所思地欲接又止(想起幾年前為著小事在球場不歡而散的場面)，他搖搖頭，又把電話收回褲袋。
第四場
時間：晚上
地點：球場
人物：志勤、卓民、偉文
燈不亮，背後響起 “那些年”的音樂，夾著一群人說話的聲音(十多年前的回憶聲帶: (比賽場上)1、2、3 初三甲加油！志勤接波，yeah！……(放學鐘聲響起後)志勤，我地要練波啦！下星期比賽啦！我遲D先教你做代數……(考試前)志勤，要加油呀！我地一定要一齊升班！……(志勤離校時，卓民哀傷地說)志勤，無論去到邊，我們地都係好兄弟……
燈亮，此場為回憶片段，三人相約在球場打球……偉文把球傳給卓民，卓民踏步投籃，球在框邊徘徊良久不入，偉文再上籃，球仍不入，反彈至三分線外，志勤剛好接上，他在三分線外投球，一投即中……
卓民：好球！志勤不愧係我地既最佳射手，多年來身手不變，我哋就唔得啦，老啦！
志勤：投球準有咩用？讀書唔好！
卓民：唔係咁計既，拿！你早做野幾年，依家有車有樓，又就快結婚添，幾令人羨慕呀！
偉文：咪係！讀書好有咩用呀？得個做字！我地做社工既，工作又辛苦，福利又差；卓民讀名牌大學，去教書都唔好得幾多啦！
卓民：係架！我有個學生畢業後去賭場做莊荷，薪酬同我相差無幾，人生好似抽獎咁，無公平可言！
志勤：(臉色一沉)我地做莊荷，好受氣架，點似你地咁受尊敬！
卓民：唉！尊咩敬呀?尊敬值幾多錢？學生越來越難教！(非常無奈)
偉文：(點頭認同)咪係！好多教師都轉行做莊荷啦，知道係咁，好似志勤你咁，唔讀大學好過！讀到嘔都係得個桔，算啦，世事無公平既！
志勤：(有點不甘)唔公平？我地高付出高回報啫！以前，我地一齊溫習，我被學校勸退，卓民攞獎學金，又叫公平咩?你讀麻省理工好叻咩？我都報左澳門理工……你地咪睇死我，我都可以大學畢業架！
卓民：唔好嬲！大家隨便呻下啫！
偉文：邊個睇小你啫？唔好咁小器啦！
談起 “讀書唔成好無用”、 “做莊荷唔值人工高”，志勤覺得自尊受損，於是拋下籃球離開。
燈暗，空中響起用結他彈奏 “那些年”的音樂，還有回憶中媽媽既獨白：老師，比勤仔一個機會啦，佢好乖仔架……我地文化唔高，都希望個仔好，老師，我求下你……勤仔，求老師比你留低啦……
第五場
時間：凌晨三時
地點：家中
人物：志勤、小燕、麗姐
燈亮，志勤半夜下班回家……
志勤：麗姐！咁早呀？去夜蒲呀？
麗姐：買六合彩呀，今期七千幾萬呀！你唔知咩？
志勤：凌晨去買六合彩？你當我傻仔咩！
小燕：大家都咁 “早”呀？老公，我地係咪要準備起行去學校排隊攞幼稚園考試報名表？
志勤：你訓啦，我去咪得囉，你係屋企睇仔！
麗姐：哈！依家先去蚊訓啦！我同對面街三姑和六婆約好一齊去通宵排隊，我現在去接中更！
小燕：下？阿媽你又去攞表呀?
志勤：我地自己去咪得囉，使咩你老人家晨早來撲表？
麗姐：阿媽我年紀大，邊使訓咁多呀！學校派3000張表，派完就無架啦！指意你，邊拿到呀，好似上次托兒所咁……
志勤：我都話左，托兒所唔係無報，係抽唔中呀，你講極都唔明！
麗姐：係啦！係啦！明晒！你阿媽我運氣好呀，當年你入到育才，全靠我識得個客係校董咋，可惜呀，佢一早賣左咸鴨蛋啦！你當年入到育才，真係好似中六合彩咁巴閉，點知你又讀唔上……算啦，等福星阿媽出馬，幫你拿個頭彩！
志勤：係我唔爭氣，係我黑仔！係……
麗姐：唔會黑一世既，做人要醒少少，靠下關係、講下方法，邊個去攞表都一樣，最緊要攞到！你返工咁辛苦，訓覺啦，等我攞表返來，阿媽做事，你放心……(說罷，立刻關心外出)
志勤覺得抱歉，低頭無言……
小燕：你份人諗太多啦，以前既事過左去就算啦，奶奶話想親身出馬，你咪由得佢去囉！
志勤：我又係黑仔既……
小燕：係啦，有為去教育中心上課點啫？佢上一堂仲貴過我去做facial(面部美容療程)囉！
志勤：為為係係我地整個家族既榮辱，當然比你既臉面重要！
小燕：入唔到都無所謂啦，好似你以前咁，讀得咁辛苦，為咩呢？
志勤：點同啫，我父母小學畢業，物都唔識，自己唔識教、又唔識搵補習老師，我書讀多過佢地咁多……我比我父母強，我個仔一定都比我強！而且，未讀過點知讀唔上？他係我個仔，我一定要比最好既佢，要讀名校，將來 “浸咸水”(去外國留學)，光宗耀祖！……(滔滔不絕)
小燕：(不想爭辯)係啦！你啱！你啱！少嘮叨！訓啦！我一陣仲要返工。
燈滅，兩人進睡，志勤輾轉難眠，最後至天明，爬起來走進客廳。
燈亮，志勤走進舞台另一邊，拿著電話，欲打又止，跑到鏡前練習……
志勤：卓民呀？係我，我係志勤呀！您……您最近好嗎？(覺得不妥，放棄)
志勤：卓民呀？我係志勤呀！好久沒見啦，上次呢……真係唔好意思…… (羞愧，放棄)
志勤：卓民！是志勤呀！我個仔想返母校讀書，可以幫忙嗎？……(神色古怪)怕咩呀？阿媽當年求老師咁羞家既事都做過啦，佢講得啱，做人要醒少少，靠下關係、講下方法，唔好死板要面子，最緊要係做到。為左為為，為左我既家族有機會吐氣揚眉，一定要賭贏呢局！
志勤：(拿著話筒，DO、DO、DO…)唔該……我想搵陳卓民老師！
接線生：請等等！
卓民：喂，邊位？
志勤：卓民，我……係志勤！有D事想搵你幫忙……我個仔……佢
卓民：哦！你想我幫手做你個仔既入學既推薦人呀！
志勤：係呀！你永遠係最聰明既！
卓民：哈哈，因為這排好多親友都搵我做呢件事！
志勤：真係麻煩晒你！(有點不好意思！)
卓民：都三十幾年朋友啦，咪講埋D客套話！
志勤：上次真係唔好意思！老實講呀，讀書真係最重要，如果可以揀，我想個仔似你讀得書，唔係好似我咁無本事……
卓民：志勤，幾十年朋友就唔好講呢D野啦！我當然幫你，但你要有心理準備，我地每個老師大大話話都推薦十幾人，可以考到既機率，同中六合彩差唔多咋，唔好太樂觀！
志勤：我知既，多謝晒你肯幫手！我一陣攞報名表比你！
志勤放下電話，馬上興奮地回房間告訴小燕。
志勤： 老婆，唔使發夢啦，中多左個號碼啦！得左啦！……
第五場
時間：早晨
地點：教育中心
人物：志勤、Miss Wong
燈亮，志勤按鈴，Miss Wong開門
Miss Wong：黃生，你咁早既？（有點驚奇）
志勤：我唔係送仔來，我係自己來既，你咪話有個課程專門比家長既，幾時上？
Miss Wong：已經上完啦，我上次咪提過你既，你當時話係校友，又無即時報名，我仲以為你唔想讀！
志勤：唔係，我想呀！梗係想啦！幾千人爭二百幾個位，好似中六合彩咁難，我自己都要爭氣Ｄ！
Miss Wong：咁呀！一係我比學校理念、歷史、活動等資料你返去讀下，然後幫你做個模擬面試啦！
志勤：太好啦！幾多錢？（表示感恩）
Miss Wong：（查閱電腦，找不到價目）個課程都完左啦……見你係我地長期客戶，今次免費啦，當多謝你一直咁支持，記住介紹多D朋友來幫襯呀！
志勤：呢層當然啦！
Miss Wong：拿！我地現在正式開始，我坐係個邊張枱(她走向另一邊的面試區)
志勤：好！(他跟著Miss Wong一起行進)
Miss Wong：唔得！你唔好跟住入來先，我叫為為家長既名，你先行入來！佢會從你行進觀察你有冇修養既！仲有，你要注意儀容，記住唔好著得太新潮、唔好染金頭髮，呢D家長一定OUT！
志勤：哦！好既！好既！
Miss Wong：王有為家長請進！
志勤：係！老師你好！(畢恭畢敬地)
Miss Wong：王先生你好！媽媽呢？
志勤：我老婆……唔係，我內子佢返工！
Miss Wong：下！小朋友面試咁大件事，仲返工？
志勤：咁……我叫佢請假啦！
Miss Wong：係！父母都去印象分高D！再來！王先生，志勤之前讀邊間托兒所架？
志勤：哦！佢無讀托兒所架，因為我地抽唔到入托名額！(有點無奈地)
Miss Wong：咁講會失分架！無入過托兒所既小朋友，一般無咁叻！
志勤：咁我抽唔到都冇法！
Miss Wong：你要同佢講 “我小朋友係返精靈教育中心小天才班既！”
志勤：又係！唔係佢邊有咁叻！(心裏暗喜，花了那麼多錢，終於有實質回報了)
Miss Wong：正確！(聽著很高興)再來，王先生，報名表中顯示，你係我地既校友！
志勤：(臉上有份驕傲)係呀！我對學校好了解架，校訓係 “禮義廉勤”，建校100週年……(被Miss Wong截停)
Miss Wong：明白了！王生你是那屆畢業的？
志勤：(面有難色)，我……我沒有讀到畢業，因為……因為……我……
Miss Wong：(出口解圍)王先生，你說大約是那屆就好，如：1994年，沒有人會去查探出處既，輕鬆談談就好！
志勤：知道！(不能釋懷，深呼吸一下)
燈暗，繼續出現Miss Wong的發問 “如果你個仔講大話，你會點？”， “如果你個仔身上有傷痕，你會點做？”， “你地平時鍾意做D咩”?
第八場
時間：早上
地點：醫院和學校
人物：志勤、卓民
舞台分為兩部份，一邊為醫院，一邊為學校。藍色射燈在台上亮起，並作無定向發散……接著燈光加強，仿如打雷閃電，響起一小段命運交響樂。燈亮，醫院中，志勤焦急地打電話回公司……
志勤：JOHN，我個仔發燒入左院呀，我返唔到架啦！預先請假？唔係呀，我一早點知佢突然發燒呀？扣人工，好好好！扣就扣啦！(無奈地收線)
志勤：(跳入留言信箱)老婆，為為發燒呀，你快D來醫院！
醫生和護士進……
志勤：(焦急地和醫生說)醫生，我個仔聽日要去幼稚園面試，你要想辦法令佢聽日無事呀，當我求下您！
醫生：打左點滴，燒好快會退，不過細路仔大病初癒，唔太適合走動，都係唔去比較好！
志勤：唔係呀！……(失望無言)
醫生退下，志勤拿起電話打出。
右邊台燈亮，卓民在辦公桌前改作業，電話響起……
卓民：喂！邊個？
志勤：卓民，我係志勤，有為發燒入左院，可以改期面試嗎？我有醫生紙既，幫幫忙呀！
卓民：志勤，我都想幫你，但面試只係一日，唔改得架！
志勤：你幫幫忙呀！我個仔好聰明，教育中心既Miss Wong可以證明，佢D成績單各項都滿分……(焦急得好像停不下來)
卓民：你冷靜D！你冷靜D先！OK！無用架，其實所謂面試，只係碰碰運氣，三、四歲細路仔，可以考到咩啫？大家都不過係碰碰運氣。
志勤：考到架，梗係考到啦！為左呢個考試，我一家已經準備左兩年，我地無去旅行、沒買奢侈品，就係為左呢一日，呢注六合彩已經肯定會中六個字，就差在去買個步，就欠聽日咋，卓民，我求你幫下手，求你！
卓民：我唔係唔想幫你,但學校唔係我既！就算我係校長都無情講！其實入學試就好似中六合彩咁，中獎機會幾微。買六合彩唔中係正常架，係咪！而且名校既野， “入得到，未必好”，你自己都唔係未試過！
志勤：（控制不了自己）我個仔唔似我，叫 “只勤”──只係勤力，佢係”有為”，他一定可以有所作為，為王家爭氣!
卓民：（誠懇地）志勤，你雖然唔係讀書材料，你勝在”勤力”，你依家待遇同我唔差好多啫！你一樣係 “有所作為”既！唔好太傷心，你會嚇親個仔架！
志勤：（竭斯底里）唔係，唔一樣囉，你地講得啱，讀書叻係好D，讀名校係強D！──我地日捱夜捱，做左都冇人認同，買得起LV又點？買得起私家車又點？根本無人睇得起我地！我個仔唔可以好似我咁，佢應該好似你咁，讀名校，做老師，受人尊敬！卓民，我求下你，我求下你！（同時接連響起當年志勤媽媽的聲音）
媽媽：老師，求你比志勤一個機會，比我地王家一個機會！
志勤失聲痛哭，……燈滅。繼續以較小的聲量播放 “命運交響曲”。
第九場
時間：傍晚
地點：某賭場員工休息室
人物：志勤和同事們(高佬、馬王、小明、永強)
暗燈，六合彩攪珠、叫賣大小、百家樂等聲音相繼響起，投影幕打開，出現不同人的訪問片段。
A：我們教師薪酬同賭場莊荷分別唔大，我覺得極為諷刺同埋受侮辱！
B：我地比人X個時，邊有人同情呀！教書大晒呀！
C：個D係賭場做野既年輕人，以為薪酬高就好巴閉，仲學人駕靚車、買LV，睇佢地風光得幾耐！
D：唔做？唔做莊荷，做物Q呀？出面好多好工好有前途咩？自己賺錢買野唔得架？我打家劫舍咩？做高尚職業個D就可以風光呀？
E：我既志願係讀名校，做專業人士，莊荷？當然唔做啦，讀書唔成D人先會做莊荷架！
F：讀書叻大晒呀？冇左我地，澳門有十五年未費教育咩？大學生有文具津貼咩？你地年年有錢派咩？點解D讀書人可以咁無品？
志勤：(在夢中大叫)停！你地到底講夠未！(志勤伏在桌上，夢醒)
燈亮，在賭場員工休息室內，電視上播著六合彩攪珠節目，馬王興高彩烈地拿著手中的六合彩核對……
馬王：勤少，做咩發惡呀？我地對六合彩啫，嘈到你，唔好意思囉！
志勤：無事(沒精打彩地)
CANDY：勤少點會咁小器！馬王，你點搞架，一個都無中！
馬王：唉！碰下運氣啫，有幾多人真係會中六合彩？
志勤呆在一角，沒有反應……射燈照在他落寞的影像上，響起歌曲 “浪子心聲”：
命裡有時終須有
命裡無時莫強求
人比海裡沙毋用多牽掛
君可見漫天落霞
名利息間似霧化
燈在歌聲中慢慢暗下。
劇終
